Nysgjerrig på kven den nye leiaren for Finanstilsynsklagenemnda er? Vi har intervjua Kåre Idar Moljord

Klagenemndssekretariatet er sekretariat for ni ulike nemnder. Finanstilsynsklagenemnda er ei av dei. Finanstilsynsklagenemnda hadde oppstart 1. april 2025, og består av det som tidlegare utgjorde Børsklagenemnda og Klagenemnda for revisor-, rekneskapsførar- og inkassosaker. Den nye nemnda er klageorgan for dei fleste vedtaka Finanstilsynet fattar innanfor sitt tilsynsområde etter finanstilsynslova § 1-2. Dette gjeld til dømes bankar, finans- og kredittføretak, inkassoføretak, forsikringsføretak, pensjonskasser og pensjonsfond, låneformidlingsføretak, verdipapirsentralar, regulerte marknader (herunder børs- og verdipapirlovgivinga), verdipapirføretak, eigedomsmeklarar og eigedomsmeklarføretak, samt statsautoriserte revisorar og rekneskapsførarar. Ansvarsområdet omfattar til dømes alt frå klager på vedtak om kapitalkrav for bankar, via administrative sanksjonar for innsidehandel, til tilbakekall i eigedomsmeklar- og revisorsaker.

Kåre Idar Moljord – betre kjend som Kim – er leiar for Finanstilsynsklagenemnda. Han er frå Kristiansand og er advokat med lang og brei erfaring frå prosedyre og tvisteløysing. Gjennom fleire tiår har han arbeidd særleg med erstatnings- og forsikringsrett, selskapsrett og kontraktsrett. Kim arbeider i dag som advokat i kontorfellesskap i Advokatfirmaet Henriksen & Co, etter mange år som partnar i Advokatfirmaet Arntzen de Besche.

Korleis vart du leiar for Finanstilsynsklagenemnda?

Eg tenkjer nok at Finansdepartementet, som oppnemnde medlemmene, kjende til leiarrolla mi i den tidlegare Klagenemnda for revisor-, rekneskapsførar- og inkassosaker, som vart avløyst av Finanstilsynsklagenemnda.

Finanstilsynsklagenemnda er ei ganske nyoppretta nemnd, som starta opp 1. april 2025. Korleis har det vore å vere leiar i oppstartsfasa til ei så fersk nemnd?

Det har vore viktig å bli godt kjend med alle medlemmene, leiinga og saksbehandlarane i sekretariatet. Deretter å etablere faste rutinar for korleis vi skal handsame og avgjere klagesakene vi får inn. Det er heller ikkje til å leggje skjul på at det låg mange ubehandla klager i Finansdepartementet og venta på oss, og det var ei viktig oppgåve å drøfte prioriteringa av desse sakene på ein god måte saman med sekretariatet.

Finanstilsynsklagenemnda overprøver vedtak som omfattar ei rekkje ulike rettsfelt innanfor finansområdet, mellom anna bank og finans, revisjon, verdipapirområdet og eigedomsmegling. Korleis er det å arbeide med så mange ulike typar rettsområde?

Lærekurva er bratt for meg, med fleire rettsområde som eg har mindre erfaring med. Dette gjeld særleg EU/EØS-rett. Men Finansdepartementet har utnemnt høgt kvalifiserte medlemmer innan alle fagområda, og samla sett meiner eg at avgjerdene våre held svært høg kvalitet. I tillegg er vi så heldige at både leiinga og saksbehandlarane i sekretariatet leverer gode utkast, og at samarbeidet med sekretariatet fungerer svært godt.

Kva opplever du som det mest givande eller verdifulle ved å vere leiar for Finanstilsynsklagenemnda?

Det er givande og lærerikt å samarbeide med så høgt kvalifiserte medlemmer, og å få vere med på å bidra til samfunnsoppdraget vi har som klageorgan innan sentrale rettsområde av stor betydning, både for enkeltpersonar og næringsverksemd.

Kan du fortelje litt om arbeidssituasjonen din no, og korleis det er å kombinere nemndsarbeidet med livssituasjonen din elles?

Eg har tidlegare vore partnar og managing partner i eit større advokatfirma i Oslo, og er no i kontorfellesskap med Advokatfirma Henriksen & Co i Oslo, der eg trivst svært godt og har høve til å drive nemndsarbeidet i kombinasjon med eiga advokatverksemd. Eg arbeider nok ein del mindre enn tidlegare, men eg går framleis i retten, særleg med saker om advokatar sitt profesjonsansvar.

Du har lang erfaring som advokat. På kva måte er erfaringane frå advokatbransjen nyttige i nemndsarbeidet?

Eg har alltid likt å prosedere saker i retten. Der gjeld det raskast mogleg å finne kjernen i saka og argumentere for det ein meiner er den rette løysinga. Det same gjeld i stor grad i nemndsarbeidet, bortsett frå at vi der må ha eit meir objektivt og balansert perspektiv på drøftingane før konklusjonane blir trekte.

Kva driv du med på fritida når du ikkje er oppteken av jus?

Då held eg på med bridge, jakt, fiske og fritidsaktivitetar på hyttene i Valdres og Lillesand. Og så er eg så heldig at eg har fire barnebarn i alderen frå 14 år til seks månader – og ein Jaguar MK 2 frå 1962!