Hue fortel om arbeidskvardagen som juridisk rådgjevar

Klagenemndssekretariatet betener 9 ulike nemnder. Ein av dei er Klagenemnda for offentlige anskaffelser (KOFA). I KOFA-sekretariatet jobbar det 13 juristar, og Hue er ein av dei. Hue vart tilsett som juridisk rådgjevar hos sekretariatet rett etter fullført studie, våren 2024. Dette fortel Hue om sin arbeidskvardag.

Korleis er det å jobbe med offentlege anskaffingar?

– Det å arbeide med offentlege anskaffingar er både kjekt og utfordrande. Offentlege anskaffingar er gjerne meir spennande enn det høyrast ut som. Det offentlege går til innkjøp av varer, tenester og bygge- og anleggsarbeid for om lag 780 milliardar kronar kvart år. Dette er dine og mine skattepengar. Det er derfor viktig at anskaffingsregelverket vert handheva for å fremje effektiv bruk av samfunnet sine ressursar og motverke korrupsjon. Regelverket inneheld i tillegg føresegn om å ivareta viktige samfunnsomsyn som klima, miljø og anstendige arbeidsforhold.

– Arbeid med offentlege anskaffingar ber derfor eit betydeleg samfunnsansvar, og har ofte stor betydning for dei involverte partane. Det er ikkje alltid lett å finne ein god balansegang mellom eit strengt regelverk som samtidig opnar for skjønn. Ein får verkeleg utfordra seg sjølv som jurist.

Korleis er det å arbeide med nemndsarbeid og KOFA?

– Som juridisk rådgjevar er mi rolle å utrede problemstillingar og utforme utkast til nemndsavgjerder. Å skrive utkast for nemnda inneberer å vurdere partane sine påstandar opp mot det rettslege grunnlaget med utgangspunkt i forskrift og lov. Deretter avgjer nemndas medlemmar saka med utgangspunkt i sekretariatet sitt utkast, og vi mottar gode og konstruktive tilbakemeldingar frå dei. Eg opplever at denne samarbeidsforma fungerer godt, og det er svært lærerikt å lytte til og drøfte saker med Noregs spesialistar innanfor fagområdet.

Kva har du jobba med så langt?

– Det offentlege går til innkjøp av så å seie alt som er nødvendig for at samfunnet skal gå rundt. Det betyr at arbeidskvardagen og enkeltsaker er varierande. I kvar enkelt sak setter eg meg inn i alt frå anskaffingar av vintervedlikehold, til fotballmål, til større entrepriseprosjekt. Det store spennet i dei konkrete sakene gjer at arbeidskvardagen aldri er kjedeleg – eg lærar stadig noko nytt. Sjølv om ein er ansvarleg for eigne saker, har eg heldigvis fagleg dyktige kollegaer å diskutere saman med. Eg har også nyleg deltatt på to konferansar om offentlege anskaffingar, og det er svært interessant å høyre om nye problemstillingar og moglege løysingar frå ekspertar i fagmiljøet.